کراچی (بگ ڈیجٹ) تاریخی فیصلہ: متنازعہ کینال منصوبہ رد ہونے پر وزیر اعلیٰ سندھ کا پرتپاک استقبال

کراچی (بگ ڈیجٹ)( رپورٹ: پیر بخش نوناری )کراچی کونسل آف کامن انٹرسٹ (سی سی آئی) کے اجلاس میں متنازعہ کینال منصوبے کی منسوخی کے بعد وزیر اعلیٰ سندھ سید مراد علی شاہ کا ایئرپورٹ پر شاندار استقبال کیا گیا۔ پاکستان پیپلز پارٹی کے رہنما اور رکن سندھ اسمبلی ڈاکٹر سہراب سرکی نے وزیر اعلیٰ کو روایتی اجرک پہنا کر انہیں مبارکباد پیش کی۔ڈاکٹر سہراب سرکی نے اس موقع پر کہا کہ سی سی آئی میں متنازعہ کینال منصوبوں کی منسوخی ایک “تاریخی فیصلہ” ہے، جو نہ صرف سندھ بلکہ پوری پاکستانی قوم کے لیے خوش آئند ہے۔ انہوں نے کہا کہ سندھ حکومت نے ابتدا ہی سے ان منصوبوں پر واضح اور اصولی مؤقف اختیار کیا تھا، جسے اب کامیابی حاصل ہوئی۔ڈاکٹر سرکی نے مزید کہا کہ چیئرمین بلاول بھٹو زرداری نے وزیر اعظم شہباز شریف سے ملاقات کر کے اس اہم مسئلے کو ترجیحی بنیادوں پر حل کروایا، جس پر پاکستان اور بالخصوص سندھ کے عوام ان کے شکر گزار ہیں۔ انہوں نے وزیر اعظم اور وفاقی حکومت کا بھی شکریہ ادا کیا کہ انہوں نے سندھ کے عوام کی آواز سنی اور ان کے مؤقف کو تسلیم کیاانہوں نے اس فیصلے کو جمہوریت، صوبائی خودمختاری، اور وفاقی ہم آہنگی کی کامیاب مثال قرار دیا۔