اسلام آباد (بگ ڈیجٹ) نیب راولپنڈی نے بی فار یو کیس میں متاثرین کی سب سے بڑی تعداد 17 ہزار 500کو ادائیگیاں شروع کردیں
اسلام آباد (بگ ڈیجٹ) نیب راولپنڈی نے بی فار یو کیس میں متاثرین کی سب سے بڑی تعداد 17 ہزار 500کو ادائیگیاں شروع کردیں۔
نیب اعلامیہ کے مطابق قومی احتساب بیورو (نیب) اسلام آباد نے بی فار یو فراڈ کے متاثرین میں وصول شدہ رقوم کے چیک کی تقسیم کے حوالے ایک خصوصی تقریب کا انعقاد کیا ۔تقریب کی صدارت چیئرمین نیب، لیفٹیننٹ جنرل (ر)نذیر احمد نے کی۔بی فار یو فراڈ پاکستان کے سب سے بڑے مالیاتی فراڈز میں سے ایک ہے۔ سیف الرحمان اور اس کے ساتھیوں نے شیل کمپنیوں کے ذریعے آن لائن پونزی اسکیم کے طور پر چلایا۔ اس اسکیم کے تحت عوام سے 7 فیصد ماہانہ منافع کے وعدے کے تحت اربوں روپے جمع کیے گئے۔نیب نے اس معاملے کی تحقیقات 5فروری 2021 کو شروع کیں۔ تحقیقات کے دوران نیب نے ملزمان کے 56بینک اکاونٹس، جائیدادوں اور دیگر اثاثوں کو منجمد کیا، جبکہ آن لائن ڈیٹا ڈان لوڈ کر کے متاثرین کے دعووں کی تصدیق بھی کی۔نیب کی انتھک کوششوں اور قانونی کارروائیوں کے نتیجے میں 7.3 ارب روپے کی ریکوری کا عمل شروع کیا گیا۔
نیب اعلامیہ کے مطابق ابتدائی مرحلے میں 3.7 ارب روپے کی رقم 17,500 متاثرین میں تقسیم کی جا رہی ہے، جن میں سے 10,000 متاثرین کو مکمل رقم ادا کی جا چکی ہے، جبکہ باقی 7,500 متاثرین کو ان کی رقم کا 40 فیصد ابھی دیا جا رہا ہے، جب کہ باقی 60 فیصد رقم ملزمان کی جائیدادوں کی نیلامی کے بعد چھ ماہ کے اندر ادا کی جائے گی۔چئیرمین نیب نے اس موقع پر کہا کہ نیب کی توجہ عوام الناس کو لوٹنے کے بڑے مقدمات پر توجہ مرکوز کرنا اور ملزمان سے 100 فیصد لوٹی ہوئی رقم وصول کر کے متاثرین کو کم سے کم وقت میں واپس کرنا شامل ہے۔چیئرمین نیب نے اس کیس میں نیب راولپنڈی کی پوری ٹیم کے لیے عمرہ پیکیج کا اعلان بھی کیا اور کہا کہ آئندہ متاثرین کو اپنی رقم وصول کرنے کے لیے نیب دفاتر آنے کی ضرورت نہیں پڑے گی، رقم ان کے بینک اکاونٹس میں براہ راست منتقل کر دی جائے گی ۔متاثرین کی جانب سے نیب کی کاوشوں پر مکمل اطمینان اور شکریہ کا اظہار کیا گیا ۔
