تاشقند (بگ ڈیجٹ) تاشقند میں وسطی ایشیا-خلیجی تعاون کونسل تھنک ٹینک فورم کا پہلا اجلاس 28 اپریل سے شروع ہوگا
تحریر ریحان خان
تاشقند، جمعرات، 24 اپریل 2025 (بگ ڈیجٹ): ازبکستان کے دارالحکومت تاشقند میں 28 اور 29 اپریل کو وسطی ایشیا اور خلیجی تعاون کونسل (جی-سی-سی) کے درمیان پہلا تھنک ٹینک فورم منعقد ہونے جا رہا ہے، جس کا موضوع ہے: “اسٹریٹجک شراکت داری کو مضبوط بنانا: تاریخی روابط سے جامع تعاون تک”۔
یہ اہم فورم ازبک صدر کے ماتحت انسٹیٹیوٹ فار اسٹریٹجک اینڈ ریجنل اسٹڈیز اور سعودی عرب کے گلف ریسرچ سینٹر کے اشتراک سے منعقد ہو رہا ہے، جس میں 70 سے زائد ممتاز ماہرین وسطی ایشیا کے ممالک — قازقستان، کرغیزستان، تاجکستان، ترکمانستان اور ازبکستان — اور خلیجی ریاستوں — سعودی عرب، متحدہ عرب امارات، قطر، کویت، عمان اور بحرین — سے شرکت کریں گے۔
یہ فورم دونوں خطوں کے درمیان تعاون کے فروغ میں ایک اہم سنگِ میل ثابت ہوگا۔ تھنک ٹینکس کے نمائندوں کے ساتھ ساتھ خلیجی تعاون کونسل کے سیکریٹریٹ، سفارتی حلقوں اور کاروباری برادری کے نمایاں افراد بھی اس میں شریک ہوں گے۔
شرکاء دو طرفہ اور کثیر جہتی تعاون کے کلیدی پہلوؤں پر غور کریں گے، جن میں سیاسی مکالمے کے فروغ، علاقائی سلامتی کے لیے مشترکہ حکمت عملی، اور تجارت، سرمایہ کاری، قابلِ تجدید توانائی اور ٹرانسپورٹ رابطوں میں اقتصادی تعاون کو وسعت دینے پر خصوصی توجہ دی جائے گی۔
فورم میں ایسے قابلِ عمل تجاویز پر بھی غور ہوگا جن کے ذریعے خطے کے درمیان تعلقات کو نئی جہت دی جا سکے۔ مباحثوں میں دونوں خطوں کے درمیان مشترکہ تاریخی و ثقافتی ورثے کے تناظر میں ترقیاتی منصوبہ بندی پر بھی غور کیا جائے گا۔
فورم کے ممکنہ نتائج میں ایک مشترکہ اعلامیہ کی منظوری اور وسطی ایشیائی و خلیجی تھنک ٹینکس کے درمیان تعاون کے یادداشتوں پر دستخط شامل ہیں، جن کا مقصد ماہرین کی سطح پر طویل المدتی شراکت داری اور ادارہ جاتی رابطوں کو فروغ دینا ہے۔
فورم سے حاصل ہونے والی بصیرت اور سفارشات دوسری وسطی ایشیا–خلیجی سربراہی کانفرنس کے لیے بھی رہنما ثابت ہوں گی، جو آئندہ ماہ سمرقند میں منعقد ہوگی۔
تاشقند فورم نہ صرف تاریخی رشتوں کو ازسرنو اجاگر کرے گا بلکہ خطے کے مستقبل کے لیے پائیدار اور بصیرت افروز تعاون کا نیا باب بھی رقم کرے گا
